ГРКОВСКА : ГРАЃАНИТЕ БАРААТ РЕЗУЛТАТИ ВО БОРБАТА ПРОТИВ КОРУПЦИЈАТА, ДА СОЗДАДЕМЕ УСЛОВИ ЗА ВЛАДЕЕЊЕ НА ПРАВОТО, ЗА ЕДНАКВОСТ ПРЕД ЗАКОНОТ И ПРЕД ИНСТИТУЦИИТЕ

0
266

„Граѓаните бараат резултати во борбата против корупцијата, а не декларативни заложби. Или сериозно ќе се зафатиме со отстранување на дефектите и вирусите од системот или истите ќе нé изедат самите како трули јаболка. Иднината на нашите општества е во прашање. Вака, како досега,  едноставно веќе не може. И затоа се радувам што и денес ќе имаме можност да разговараме за тоа како да го подобриме и зајакнеме ударот кон организираниот криминал и корупцијата, на кој начин можеме да ја подобриме регионалната соработка на земјите од Западен Балкан во борбата против корупцијата и незаконските финансиски текови во регионот, особено во контекст на Берлинскиот процес“, порача заменичката на претседателот на Владата задолжена за политики за добро владеење, Славица Грковска, на денешната Регионална конференција за борба против корупцијата, која ја организира во соработка со Канцеларијата на Обединетите Нации за дрога и криминал (UNODC), со поддршка на Владата на Велика Британија и Регионалната Антикорупциска Иницијатива.

Целта на конференцијата е да се унапреди регионалната соработка на земјите од Западен Балкан во борбата против корупцијата и незаконските финансии во регионот во контекст на Берлинскиот процес. Покрај високи претставници од земјите од Западен Балкан, присуствуваа и претставници од клучните институции надлежни за борба против корупцијата во регионот.

Вицепремиерката Грковска нагласи дека не постои во светот општество целосно имуно на корупција, но факт е дека секоја држава е различно подготвена и различно реагира на корупцијата.

Таа информираше дека од крајот на јуни минатата година кога е усвоен Регионалниот патоказ за борба против корупцијата и нелегалните финансиски текови за брзо следење на спроведувањето на Конвенцијата на Обединетите нации за борба против корупцијата (УНКАК), соработката на земјите од западен Балкан е интензивирана и значајно попродуктивна. Во изминатиот период се работеше, додаде таа, на трите идентификувани приоритетни области, а тоа се транспарентност во текот на целиот циклус на јавни набавки, како и подобар надзор и отчетност во јавните набавки, на зајакнување на напорите за спречување, идентификување и управување со судир на интереси, како и зајакнување на соработката на сите нивоа преку меѓуагенциски пристап на органите за спроведување на законот, обвинителството и судството, единиците за финансиско разузнавање.

„Јас немам илузии дека корупцијата целосно ќе ја победиме, но мора веќе да имаме видливи и конкретни резултати. Мора да создадеме услови за владеење на правото, за еднаквост пред законот, за еднаквост пред институциите. Сите ние имаме обврска да ја зајакнеме довербата на граѓаните во институциите, а тоа ќе го постигнеме само ако покажеме дека со професионална, ефикасна и одговорна работа застануваме на патот на криминалот и корупцијата. Во повеќе наврати сум кажала, но и денеска ја чувствувам потребата да повторам. Промените зависат од сите нас. Зависат од граѓаните, но особено зависат од нас што сме на раководни позиции, од нас кои креираме политики, кои носиме одлуки“, додаде вицепремиерката Грковска.

На првиот дел од Регионалната конференција се обратија и евроамбасадорот Дејвид Гир, како и Ерик Мејер, заменик амбасадорот на САД во земјава, Сузи Дајкин од британското Министерство за внатрешни работи, како и претставници од владите на Република Србија, Црна Гора и Албанија.