Позитивна оценка за првичната реакција на Владата
Поранешниот политичар и член на СДСМ, Гордан Георгиев, изјави дека сегашната Влада добро се справува со ситуацијата по трагичниот настан во Кочани. Иако свесен дека неговиот став може да биде погрешно интерпретиран. Георгиев нагласи дека менаџирањето на кризата досега било коректно, со оглед на околностите.
Масовни апсења – сигнал за политичка волја
„Имавме масовни апсења во последниве денови, што е јасен сигнал дека постои волја за промени“, изјави Георгиев. Тој додаде дека следењето на овие процеси и нивната завршница ќе биде пресудно за тоа како ќе се перцепира работата на Владата.
Судбината на Владата зависи од исходот на случајот
Според Георгиев, иако актуелната Влада има само девет месеци мандат, трагедијата претставува сериозен товар што ќе ја следи до крајот на нејзиното владеење. „Овој настан ќе ги прогонува, ќе ја дефинира Владата и нејзиното политичко наследство,“ предупреди тој.
Или правда и борба против криминалот – или политички неуспех
Георгиев беше дециден дека правдата мора да биде испорачана, а борбата против непотизмот и криминалот мора да се реализира:
„Ако не успеат да покажат резултати и искрена борба со сè што е гнило во ова општество, ќе бидат запаметени како најлошата Влада. Но, ако испорачаат правда – тоа ќе биде голем чекор напред за сите нас.“
Иако јавноста сè уште е потресена, Георгиев заклучи дека вистинскиот тест за Владата допрва следи.
