ВМРО-ДПМНЕ ја голтна првата дебела и огромна кнедла во Собрание по договорот од Пржино, Рената Тренеска Дескоска избрана за нов потпретседател на Собранието!

0
495

Рената Тренеска Дескоска денеска со 86 „за“ и еден „против“ е избрана за потпретседател на Собранието на предлог на пратеничката група предводена од СДСМ. По гласањето Тренеска Дескоска даде свечена изјава дека совесно, одговорно и согласно законите и Уставот ќе ја извршува оваа функција.

sobranie-540x322

Пратеникот Горан Мисовски кусо образложи дека Тренеска Дескоска е позната во општествениот и политичкиот живот, професор е на Правниот факултет, доктор на науки, автор и коавтор на преку 30 книги и сто трудови. Изрази надеж дека таа ќе води некои од седниците на Парламентот.

Повтори дека враќањето на опозицијата во Собранието е само поради постигнатиот договор во Пржино и се наврати на причините поради кои опозицијата дури на 1 септември се приклучи во работата на Собранието.

– Овој парламентарен состав ќе мора да донесе нов изборен закон, законско решение за специјален обвинител и да изгласа специјален обвинител и да изгласа оставка на Никола Груевски, рече Мисовски.

Собранието односно владејачкото мнозинство, според пратеникот на НСДП, не ја научила лекцијата од 24 декември и оти во последните неколку месеци по скратена постапка се донесени 289 закони.

Координаторот на пратеничката група на ВМРО-ДПМНЕ Илија Димовски посочи какви закони се донесени во периодот додека опозицијата отсуствуваше од Парламентот а кои се однесуваат за подобрување на животот на граѓаните.

– Она што од вас го видовме е како мирно стоевте на прес-конференциите на лидерот на опозицијата Зоран Заев, а патем земавте плата од Собранието, реплицираше Димовски.

Подоцна тој апелираше до пратениците на СДСМ спротивно на одлуката на нивната партија да не бидат послушници на партиските одлуки, да прифатат понуда од пратениците на ВМРО-ДПМНЕ и да се изгласа промена на изборниот модел во мнозински систем и партиите во своите населени места да се соочат и да се види кои пратеници биле избрани без гласови.

Собранието не треба да се злоупотребува од страна на пратениците за политичка кампања, предупреди независната пратеничка Солза Грчева, која и порача на опозицијата дека договорот од Пржино за нивното враќање е само краткорона замка и изговор и оти до изборите во Собранието има уште многу работа.

Пратеникот Горан Милевски од ЛДП, го поздрави предлогот Тренеска Дескоска да биде избрана за потпретседател на Собранието. Рече дека е вистинско решение за ова место. Тренеска Дескоска, според него, во периодот што следува има многу важна задача да помогне да се врати довербата во Собранието и да се спроведе договорот од Пржино.

– Сите ние ќе направиме се договорот од Пржино да се имплементира и да се врати демократијата, рече Милевски, кој исто како и неговите колеги од опозицијата изнесоа низа обвинувања на сметка на практикувањето на власта и работата на пратениците.

На седницата беа изгласани и одлуките за пополнување на испразнетите места во собраниските комисии и тела од страна на пратеници на опозицијата.

Собранието го одржа продолжението на 4-та седница на која се констатира повлекувањето на оставките на пратениците од опозицијата.