(ВИДЕО) Тензично кај ЕУ-Инфоцентар: По повикот на Генерал Ангелов демонстрантите се судрија со полицијата!

0
486

Демонстрантите и полицијата се судрија на булеварот Свети Климент Охридски, пред зградата на Театар „Комедија“, јавува Мета“.

До инцидентот дојде откако лидерот на Достоинство, Стојанче Ангелов, кажа дека полицијата нема право да ги сопира граѓаните да го изразат својот револт бидејќи протестот е мирен и меѓу демонстрантите нема насилници. Тој апелираше старешината да ги повлече полицајците за демонстрантите да продолжат да се движат.

 

Ангелов во еден момент ги повика демонстрантите да му се приклучат и да ѝ се спротивстават на полицијата. Демонстрантите тргнаа кон полицајците и настана мал судир, при што полицајците успеаја да ги одвратат граѓаните назад.

Атмосферата е тензична, а граѓаните извикуваат „Пуштете го народот“, „Долу диктатура“, „Слобода“.

Протестот почна во 18 часот, пред зградата на Специјалното јавно обвинителство, од каде маршот продолжи кон Собранието на Република Македонија. Движејќи се кон Собранието, демонстрантите застанаа пред Министерството за правда, каде фрлаа тврди објекти и кесички со боја.

По изразениот револт пред Собранието, демонстрантите се упатија пред зградата на Владата, а оттаму кон ЕУ-Инфоцентарот, каде и се случи малиот инцидент.