Новинската агенција „Асошиетед прес“ денеска известува за „огромни“ и „масовни“ граѓански маршеви во Белград и други градови во Србија, „како одговор на повикот на универзитетите и студентите за генерален штрајк како дел од повеќемесечната битка против корупцијата во оваа балканска земја“.
„АП“ проценува дека антикорупциските протести низ Србија траат со месеци и потсетува дека тие започнале во ноември, откако натстрешница на железничката станица во Нови Сад усмрти 15 луѓе и создаде масовно движење против популистичката влада на претседателот Александар Вучиќ, пренесува Бета.
Американската новинска агенција јавува дека денеска „многу продавници, кафулиња и ресторани во Србија се затворени како поддршка на универзитетите и училиштата каде наставата е прекината повеќе од три месеци“ и дека помали протести се одржани во неколку други градови и населени места низ земјата со повик за генерален штрајк.
Во Белград се соопштува дека „огромна поворка од луѓе прошетала низ улиците на центарот на градот и поминала покрај владините згради (на Србија)“, а студентите кои марширале рекле дека нивниот денешен протест е „увертира“ на масовниот собир планиран за 15 март во Белград.
Се потсетува дека слични собири беа одржани и претходните недели во други градови.
Вучиќ, како што пишува „АП“, се обидува да ги минимизира протестите со тврдењето дека тие се дел од заговорот на Западот за негово соборување од власт, а денеска „за наводниот обид за револуција телефонски разговарал со рускиот претседател Владимир Путин“.
„АП“ пишува дека српскиот претседател на Инстаграм напишал дека „Русија добро разбира и јасно гледа што се случува“ и дека „ќе продолжи да ги поддржува легално и легитимно избраните власти во Србија“.
Американската агенција оценува дека упорните протести, кои започнаа во ноември, станаа „најголем предизвик за Вучиќ во последните години“.
АП известува и за „контрапротест на група студенти на Провучиќ кои кампуваат пред седиштето на претседателот, велејќи дека сакаат нормалните студии да продолжат и бараат прекин на повеќемесечните блокади на српските универзитети“.
„Нивниот протест веројатно беше дизајниран да го минимизира обемот на антикорупциските акции на студентите“, заклучува „АП“.
