Тренерот на Реал Мадрид, Карло Анчелоти, се осврна на моменталната форма на францускиот напаѓач Килијан Мбапе, кој неодамна промаши пенал на натпреварот против Атлетик Билбао (1-2), што доведе до жестоки критики од страна на навивачите и шпанските медиуми.
Анчелоти, иако призна дека Мбапе не е во својата најдобра форма, истакна дека е потребно време за да се прилагоди и дека се очекува од него да ја подобри својата игра.
„Мбапе не игра најдобро во моментов, но тоа е сосема нормално кога се преминува во нов клуб и нова средина. Тој има многу талент и се уште се адаптира на стилот на игра на Реал Мадрид. Има потенцијал да биде уште подобар. За мене, најважно е што покажува посветеност на тренинзите и секојдневно напорно работи за да ја подобри својата игра. Постигна 10 голови, што е импресивно, иако верувам дека може да постигне и многу повеќе“, изјави Анчелоти.
Тренерот на „кралскиот клуб“ истакна дека иако моменталните резултати не се најдобри, Мбапе продолжува да работи на себе и дека клубот му дава поддршка, знаејќи дека неговиот потенцијал е огромен. „Мораме да му дадеме време, не само за да се прилагоди на тимот, туку и за да ја најде својата најдобра форма. Тој е важен играч за нас и ќе продолжиме да го поддржуваме“, додаде Анчелоти.
