Деветстотини рудари од Добрево и Тораница од утре стапуваат во генерален штрајк пред управната зграда во Пробиштип. Штрајкот е радикализиран откако вчера истече рокот за исплата на платата за август кој рударите и го дадоа на компанијата, пренесе 24 Вести.
Синдикалниот одбор на Добрево за 24 Вести вели дека нема да се вратат во јамите се додека не се исполнат нивните барања.
„Очекуваме и бараме да се исплатат заостанатите плати и придонеси за рударите да бидат доплатени и придонесите за последните 5 месеци. Нема да се спуштиме во јамите се додека не ни обезбедат нормални услови за работа, а тоа е заштитна опрема, вода и струја“, велат од синдикалниот одбор на рудникот Добрево.
Наместо решение, состојбата станува се посложена. Се побара и помош од Владата.
Рудниците за олово и цинк кои се наоѓаат во Пробиштип и Крива Паланка ги раководи индиската фирма Индо Минерали.
Од минатата недела рудниците се без струја и вода, бидејќи индиските газди не ги платиле сметките кои според синдикалците веќе се со милионски суми.
Поради немање на соодветна опрема, пред еден месец Индо Минерали заработи и казна од Инспекторатот за труд. Во двата рудника работат околу 1000 рудари.