Подводна фотографија од нуркачи кои пливаат со китови е фотографијата што е прогласена за победник на годинешниот натпревар Traveler Photo Contest на National Geographic. На конкурсот учествуваа повеќе од 17.000 фотографии.
Победничката фотографија е снимена во близина на Рока Партида, остров во Мексико. Авторот Ануар Патјане Флориук како награда доби осумдневно патување во Костарика и Панамскиот Канал за двајца.
„Фотографијата воопшто не беше планирана, всушност фотографирав во близина на главата на китот кога тој започна да плива кон останатите од тимот. Нуркачите му дадоа простор на китот и неговото младенче, а јас само го доловив моментот“, раскажува фотографот.
Фејзал Азим од Бангладеш освои второ место со фотографија од работници, а како награда ќе добие шестдневна фото експедиција за двајца во Јелоустон.
Третото место го освои Ахмед Ал Токи од Оман, кој доби шестдневно крстарење за двајца.
Останатите фотографии се победници во четири категории: портрети, надворешни сцени, места и спонтани моменти.