Пет забранети намирници за појадок

Појадокот е најважниот оброк во денот, но дали знаеме што треба да се јаде за појадок? Утринскиот оброк му дава на организмот енергија и го контролира нивото на шеќер, само доколку сме разумни во изборот на намирници. Во спротивно, од најважниот оброк во денот лесно може да направиме оброк кој ни носи само тежина и вишок на килограми.

Овошен сок

Поточно, сок во тетрапак кој изобилува со шеќер. Доколку денот сакате да го почнете со сок, тогаш тоа нека биде свеж и цеден сок од овошје кое не изобилува со шеќер, на пример лимон или грејпфрут. Останатие сокови, дури и цедени, одложете ги за меѓуоброк. Тоа важи и за свежиот портокал, ако не мислите од него да исцедите само еден.

Мармалад на леб

Изгледа дека нема полош појадок од леб и мармалад за појадок особено ако количината е позамашна. Па уште и под мармаладот, лебот да го премачкате со маргарин. Станува збор за чисти јагленохидрати и шеќер кој ќе ви дадат чувство на ситост, но не за долго, и  нема да го разбудат вашиот организам, туку напротив ќе го забават.

Палачинки

Омилениот појадок на многумина е всушност повторно – леб и шеќер. Палачинките, крофните, мафините и вафлите се десерти, а не појадок и секако треба да се избегнуваат. Наутро сме најгладни, па од нив може да изедеме без мерка. Исто како и во случајот со мармалад и леб, само ќе го забават организмот и ќе ви помогнат побрзо да ставите некој килограм повеќе на себе.

Бурек

Популарниот македонски појадок бурекот време е да го дегустираме само како специјалитет (што навистина и е), значи не секојдневно и во мала количина. Многу вкусен, но мрсен и крајно нехранлив, ќе ви го задоволи чувството за ситост, ама ниту една здрава состојка преку него нема да внесете. Да не зборуваме за симит-погачите, односно за мрсен леб во леб. Ако веќе сте слаби на пецивата, паметен појадок може да биде мало ѓеврече со немасен јогурт.

Паштети и салами

Најголемиот дел на производи од обработено месо, вклучувајќи ги и колбасите, шунката, сланината, паштета, саламите – содржат нитрати, хемикалии кои се непосредно поврзани со појава на рак на дебелото црево. Секогаш двапати размислете пред да се нафрлите на нив. Попаметна варијанта за појадок е кајгана со малку пршут.