Лоренцо ја освои ГН на Италија

Возачот на Јамаха, Хорхе Лоренцо, во доминантен стил победи на трката за Големата награда на Италија, шеста во сезоната во Мото ГП шампионатот.

Лоренцо до третата последователна победа во кралската класа во Мото ГП првенството стигна со време од 41:49.173 минути на патеката Муџело.

Шпанецот до победата стигна пред италијанскиот двоец Андреа Јаноне (Дукати) и Валентино Роси (Јамаха).

Трката за ГН на Италија, покрај доминантното возење на Лоренцо, кој во вториот свиок го презеде водството и до крајот не дозволи никој да ја загрози неговата позиција, донесе исклучително интересна борба за втората и третата позиција.

Втор на крајот заврши Јаноне кој стартуваше од втората позиција, додека Роси стигна до третото место иако стартуваше од осмото место. Јаноне ја доби битката со актуелниот шампион Марк Маркез, кој излета на шест кругови до крајот и не ја заврши трката, додека Роси ја доби битката за третото место со Довициозо (не ја заврши трката поради технички проблеми) и Педроса.

По шест трки во кралската класа, лидер во пласманот е Роси со 118 бодови, шест повеќе од Лоренцо, додека Довициозо е трет со 83 бодови.

Првенството во кралската класа ќе продолжи со трката за Големата награда на Каталонија, која ќе се вози на патеката „Каталуња“ на 14 јуни.