Заев на средбата со Тимоние: Мнозинската волја на граѓаните скоро ќе се реализира!

Претседателот на СДСМ, Зоран Заев, денеска се сретна со амбасадорот на Р.Франција во Р.Македонија, Кристијан Тимоние.

Констатирано е дека е неопходно стабилизирање на државата преку продолжување на демократските процеси во Македонија.

-Парламентарното мнозинство од 67 пратеници ќе го избере новиот претседател на Собранието, а потоа и новата реформска Влада, според Деловникот, Уставот и законите во Р.Македонија. Должност на сите е да ја почитуваме мнозинската волја на граѓаните изразена на кредибилните избори на 11 декември и скоро ќе се реализира, рече претседателот Заев.

На средбата е оценето дека е потребно да се покаже зрелост за државните интереси на Македонија, а тоа се реформските процеси за квалитетен живот на сите граѓани и евро-атлантски перспективи на Р.Македонија. Никакви седнувања на заедничка маса од типот на Пржино 3, 4 и слично не се во интерес на потребниот развој на државата.

-Постои Програма на новата реформска Влада на унитарна Македонија, којашто е единствениот валиден документ за граѓаните и којашто гарантира просперитет за сите луѓе во Македонија и за државата. Таа Програма ќе ја спроведе новата Влада. Груевски се обидува да се наметне како фактор, преку тоа што наметнува непостоечки теми, поттикнува провокации, но ние сме јасни, договор за амнестија нема. ВМРО-ДПМНЕ мора да прифати дека е опозиција. Следува формирање на новата реформска Влада, воспоставување на правната држава и на независни институции, рече претседателот Заев на средбата со францускиот амбасадор Тимоние.