На 40 километи од Скопје, во Зелениково. Тука живее двојникот по име на Стево Пендаровски, Стево Продановски, носител на листа на Социјал демократската партија. Телма се обиде да го пронајде и праша дали некогаш се занимавал со политика, зошто се одлучил да стане пратеник, дали само името и презимето го однеле на врвот на листата. Ги запрашавме соседите, каде живее Продановски, потенцијалниот пратеник, пренесува Телма.
Куќата ја најдовме ама не и Продановски. Синот кој не пречека ни кажа дека е на работа во железница.
За Политиката во која е неговиот татко не сакаше да зборува, ама ни даде телефонски број. Продановски пак не одговара.
Безуспешен беше обидот да ја пронајдеме и Радмила Шукуровска од Прилеп. Никој немаше на адресата на која живее во населбата Варош на крајот од градот. Соседите коментираат дека е млада невработена, мајка на три деца. Ама ја гледале како оди во штабот на ВМРО-ДПМНЕ, велат била член, дали е се уште не знаат.
Ова се четврти парламентарни избори на кои партијата на Јаневски пријавува кандидати со исти имиња како носителите на СДСМ. Истото се случуваше на изборите во 2006-та, 2008-ма и 2014-та и низ тие изборни циклуси на Јани Макрадури противкандидат му беше Јанис Макрис, на Радмила Шекеринска – Рада Шекерова, на Марјанчо Николов – Марјанчо Наков, на Зоран Заев-Зоран Зашев, на Јован Манасиевски – Јован Манчевски, на Илинка Митрева – Илинка Митовска и на Игор Ивановски – Игор Ивановски. Во 2008 година коалицијата на СДСМ ја тужеше партијата на Јаневски оти со манипулациите со имиња добија три пратеници помалку но сите судови ја одбија вклучително и врховниот.