Али повторно му го ЗБРЦА ножот на Грујо : ДУИ ќе поддржи формирање на специјално оделение во Кривичниот суд

Иницијатавата за формирање на специјално судско одделение за предметите кои ги работи Катица Јанева доби поддршка и од едниот партнер во владејачката коалиција. Портпаролот на Демократската унија за интеграција, Бујар Османи во изјава за Алсат-М телевизија, за прв пат вели дека неговата партија во основа нема ништо против такво решение. ДУИ има резерви само за начинот на кој тоа прашање треба да се отвори.

„Ова е сериозна тема, која не може да биде прашање на медиумски разговори или по кругови. Ако има таква волја, тоа треба да помине институционално, првин преку разговори на релевантните партии потписнички на Пржинскиот Договор. Ако во тие преговори се отвори таа иницијатива, ДУИ принципиелно е за формирање на канцеларија или посебен оддел, кој ќе се занимава со случаите на СЈО“, вели Османи.

АЛСАТ М го праша Османи и дали партијата го дели ставот на ВМРО-ДПМНЕ дека Катица Јанева работи само по налог на опозициската СДСМ. Се огради од директен одговор за позициите на коалициониот партнер, но додаде дека СЈО треба да ја докажува својата непристрасност.

„Ние немаме информација како работи СЈО, немаме пристап таму. Тоа што цениме е дека СЈО, е витален дел од пржинскиот договор, како што тој договор е единствениот начин за излез од кризава. Важно е СЈО да покаже непристрасност, поради овој јавен притисок кој се прави од партија потписничка е добро да работат уште повеќе за да докаже за непристрасната работа, без притисок од било која страна. Не го знаеме нивниот начин на работа, важно е дека ја поддржуваме нивната работа да се оди до крај со нивната работа“, додава Османи.

Идејата за специјално одделени во скопскиот Кривичен суд првично го промовираа повеќе припадници на академската заедница. Кога судот почна едно по едно да ги одбива барањата за притвор на Катица Јанева, идејата доби и поширока поддршка во јавноста и стана и едно од барањата на „Шарената револуција“. Против идејата пак беа експерти или професори чии ставови се најчесто блиски до оние на владејачката ВМРО-ДПМНЕ. Негативен беше и коментарот на доскорешниот прв човек на Судскиот совет, Бранко Ушковски.