Димитров: На Груевски му одговара збрка затоа што со рацете е длабоко во медот

Дека мешаницата околу фалсификуваните лични карти е пропаганден трик на власта за да се отргне вниманието од аферит во кои се вплеткани владејачките функционери, смета и Никола Димитров, поранешен заменик министер за надворешни работи, поранешен амбасадор во САД и Холандија, од редовите на ВМРО-ДПМНЕ.

Според него, целта на аферата е да ја збуни јавноста, а му одговара само на премирот, Никола Груевски, за кој, вели Димитров, има сериозни индиции дека е инволвиран во кривични дела и корупција.

„Немам воопшто никакви сознанија за збрката со фалсификуваните лични карти. Ниту пак имам претензии дека ги имам сите одговори. Но, знам кому му одговара ЗБРКА. На тој што е во небрано, за кого според Прибе има сериозни индиции дека е со рацете длабоко во медот, дека од целата држава направил партиски и личен слуга.

Таа збрка по се изгледа има две цели. Прво, од сите бомбардирања со вистини, полу-вистини и лаги, да се изгубиме во (дез)информативниот облак, да не веруваме во ништо и да веруваме во се. Второ, црнење на противникот по логиката: ако ние и не сме баш најневините, и тие имаат гревови. Со други зборови, верувајте дека сите се исти и не може да биде подобро. Ние барем имаме “дела” зад нас, со молба да заборавиме дека во секое “дело” по се изгледа – и како што слушнавме – има уште поголемо недело, злоупотреба на позицијата и на јавните пари.

За да им веруваме на нив, треба да не им веруваме на сопствените уши.

За да им веруваме на нив, треба умот и свеста да ги заспиеме, а совеста да ја закопаме.“, пишува Димитров на својот фејсбук профил.