“Заслужуваме подобро!” е граѓанска акција во која ние, граѓаните, зборуваме за нашите секојдневни проблеми и за нашата итна потреба од подобар живот. Ние веруваме во капацитетите на ова општество, во разумот на граѓаните и тргнувајќи од нашите права и потреби бараме итна промена на начинот на управување со државата во правец на обезбедување подобра живејачка и подобри услови во нашите градови и села.
Ние, граѓаните, имаме право гласно и јавно да зборуваме за политиката, зашто нашиот живот и нашето секојдневие се политика. Нашиот глас е важен секој ден, а не само на денот на избори.
Власта треба да одговара на нашите потреби и прашања без разлика дали ја поддржуваме или не. Политиката ни припаѓа нам, на граѓаните и имаме право да ја критикуваме власта и од неа да бараме да биде подобра или да си замине.
Оваа наша иницијатива се темели на теренски разговори и директна комуникација со граѓаните, а ја спроведуваат повеќе од 200 граѓански активисти од 70-тина граѓански организации во 30-тина поголеми населени места во Република Македонија.
Бараме подобро бидејќи заслужуваме подобро!
На пример, граѓаните и граѓанките на Прилеп навистина заслужуваат подобро здравство. Здравство кое ќе ги лекува, а не да ги заразува! Прилепчани заслужуваат подобра болница, опремена со техника, доктори, специјалисти по сите светски стандарди. Сите сме свесни за лошата и загрижувачка состојба во која се наоѓа прилепската болница. Граѓаните на Прилеп бараат подобра здравствена заштита!
Иселувањето на младите поради малите шанси да најдат работен ангажман, е хроничен проблем на градот. Младите во Прилеп заслужуваат подобро! Заслужуваат шанса да останат и да работат дома!
Иницијативата „Заслужуваме подобро“ ја темелиме на 6 основни столбови, или сегменти од граѓанското живеење, а тоа се :
ЗАСЛУЖУВАМЕ ПОВЕЌЕ ОД ПАРЧЕ ЛЕБ!
Во последните пет години трошоците за живот се зголемиле за 2.984 денари, а просечната плата се зголемила само за 407 денари!
Бараме влада која ќе обезбеди подобра живејачка! Имаме право да бараме државата да обезбеди „социјална правда, економска благосостојба и напредок на личниот и заедничкиот живот“, онака како што пишува во преамбулата на Уставот. Не заслужуваме власт која ги задолжува нашите деца и внуци. Не заслужуваме власт која неодговорно троши на чоколада, кога немаме ни за леб. Затоа, бараме власт која нема да троши на луксуз, туку ќе се бори против немаштијата.